" حوار مع كابتن احمد دعبس "
من لايعرف احمد دعبس وهو صاحب الانجاز التاريخي ليد الزمالك بالحصول على ثالث العالم في عام 2010 مع جيل الزمالك الاسطوري الذي فاز معه بكل البطولات الممكن الفوز بيها
حيث اكتسح افريقيا طولا وعرضا وفاز بالدوري مع الفريق دون اي هزيمة مسطرا تاريخيا جديد مع اسياد افريقيا في اليد نادي الزمالك
ولكن كان رحيله مخيبا للامال في عام 2011 ولكن خلفه في مهمة الانجازات ايمن صلاح المدرب الحالى للزمالك .
" الحوار "
سـ1 : اهلا بالكابتن احمد دعبس معنا .. عايزين نعرف حضرتك دلوقتى بتدرب نادى ايه ؟ هل لازالت مع القادسية الكويتي
جـ1 : اهلا بيك يا عمر .. اه مازالت مع القادسية الكويتي من بعد رحيلي عن نادى الزمالك
سـ2 : بداية عايزين نعرف رأى حضرتك في عودة الكابتن ايمن صلاح لقيادة يد الزمالك من جديد ورأيك في فوزه الاخير مع الافريقي ببطولة افريقيا امام النادى الاهلى ؟
جـ2 : والله شايفها بدايه مطمئنه و محاوله لارجاع كرة اليد بنادي الزمالك للمسار الصحيح و تحسب لصالح مجلس الاداره الحالي و فوز ايمن في المباراه دي حافظ علي سمعه مدربي كرة اليد المصريين كلهم
سـ3 : هل حدث اي اتصالات بينك وبين مجلس ادارة الزمالك الفترة الماضية للعودة لقيادة الفريق ؟
جـ3 : لا والله يا عمر ولا من بعيد ولا من قريب بس الحقيقه انا ما حدش اتصل بيا ولا عرض عليا و الناس هنا الحمدلله متمسكين بيا
وفعلا كان في كلام اني ادرب منتخب الكويت الاول بس وجودي مع النادي حاليا افضل لان المنتخب الكويتي خارج الحسابات الدوليه و الاقليميه و القاريه حتي
سـ4 : من وجهة نظرك .. كيف يكون الزمالك قادر على العودة من جديد للبطولات ؟
جـ4 : عدم الاستعجال لان اللاعبين الموجوديين حاليا لاعبين خبره فقط والباقى الشباب لسه مش جاهزين في خلال سنتين ممكن تعمل جيل يرجع ينافس علي المستوي المحلي و الأفريقي
بس اكيد الموسم الحالي هيكون افضل بكثير من الموسم الماضي و ممكن تنافس بقدر معقول علي بطولة الدوري و الكأس و الرياضه مافيهاش كبير .. الرياضه فيها التزام و روح !
مساندة جمهور الزمالك لفريف اليد فحدها ممكن تديله فرصة الفوز بالبطولات الموسم الحالي .. بطولة الكاس ممكن تكون اسهل من الدوري لان الدوري محتاج اعداد اكثر و نفس طويل
سـ5 : ما رأى حضرتك في قضية الوايت نايتس ومشكلتهم مع ادارة نادى الزمالك وخصوصا انهم كانوا دايما في الصالة مع فريق اليد ؟
قضية الوايت نايتس قضيه سياسيه كبيره علي فكره و حلها محتاج وقت لكن وجودهم فعلا مع كرة اليد كان ايجابي بشكل كبير جدا و عدم وجود جمهور مع فريق اليد هيصعب المهمه جدا علي الفريق و الجهاز
سـ6 : رايي حضرتك في الحملة اللي قام بيها جمهور الزمالك على الفيس بوك وتويتر #من_اجل_الكيان لتصفية الخلافات من اجل نادى الزمالك ؟ وهل تؤيدها ؟
مشجعين و محبي الزمالك كتير لكن في البيوت وجود الوايت نايتس ضروري و طبعا انا اؤيد محاولات الصلح و تقنين و توفيق الاوصاع لمصلحة الالعاب الموجوده بالنادي كلها
سـ7 : بعيدا عن القضية دى .. كابتن ايمن صلاح كشف انه اتفق مع احمد الاحمر على العودة من جديد للزمالك الموسم المقبل في حال عدم وصول له عرض احتراف اوروبي ؟ هل الاحمر عودته مهمة للزمالك وايه الاضافة اللي هيضيفها للفريق ؟
احمد الاحمر افضل لاعب كرة يد في في مصر و وجوده اذا نجح مجلس الاداره في استقطابه مره تانيه لمصلحة الزمالك في وسط الاغراءات الماديه القويه اللي الاحمر عايش فيها
هيكون له اثر ايجابي عالي جدا من الناحيه الفنيه و النفسيه لفريق كرة اليد بنادي الزمالك
سـ8 : رجوع كابتن حسن يسري هل هيكون عامل إضافي كبير للفريق هذا الموسم خصوصا خبرته الكبيرة مع الفريق ؟
الفريق محتاج مايسترو زي حسن يسرى الموسم الحالي علشان يحصل تناغم بين اللاعبين و بعضهم و بالتالي تقدر تاخد اففل ما عند كل لاعب فطبعا وجوده ايجابي في مجال التنظيم مش في حيز التهديف
سـ9 : نعود مع بعض للوراء .. كان اطلق ان رحيل حضرتك كان بسبب الظروف المادية الصعبة للنادى في ذلك الوقت ومشكلة مستحقات اللاعبين هل السبب كان صحيح ؟
غير صحيح , السبب كان جهاز كرة اليد وقتها بعد فوزنا في نفس الموسم ببطولة الدوري المرتبط و دوري السوبر و بطولة افريقيا و بطولة سوبر افريقيا و مركز ثالث في بطولة العالم للانديه
اني مش رجل المرحلة اللي بعدها و انا تقبلت القرار بصدر رحب لكن كان ليا موقف لما فشلو في التفاوض مع ايمن صلاح و رفضت العوده لانها كانت هتبقي عوده مؤقته و مليئه بالمشاكل و ده ما كانش ايجابي ولا ليا ولا للفريق
و اطلقو عليا شائعات اني تخليت عن نادي الزمالك لكن للأسف هما اللي تخلو عني بعد كل الانجازات اللي حصلت في موسم واحد
سـ10 : لكن الامر قد يكون غريبا في سبب الرحيل خصوصا ان الفريق كان مكتسح افريقيا اكيد في سبب اخر للرحيل ممكن يكون في خلاف في وجهات النظر مع احد اعضاء جهاز كرة اليد ؟
والله انا مكنش في مشاكل مع حد وقتها خالص .. كان رئيس الجهاز خالد فتحي و مدير اداري حماده عبد الباري و عضو مجلس ادارة مشرف علي الفريق طارق انيس
و ما كانش في مشاكل مع اي حد فيهم علشان كده الشخصيات دي هي اللي تسأل عن اسباب تنحيتي في التوقيت ده بالذات بس ده موضوع قديم و خلص مالوش لازمه يتفتح دلوقتي
و الفريق حصلوا سقوط لمدة 6 اشهر تقريبا و بعدين رجعو تاني و كسبو افريقيا مرتين و السوبر مرتين و رابع العالم مرتين مع كابتن ايمن صلاح
سـ11 : اخيرا .. كلمة اخيره لجمهور نادى الزمالك ؟
وجودكم هو روح النادي .. الزمالك من غير جمهوره .. لا تعليق
ان شاء الله في اول زياره لمصر هزور نادي الزمالك و فريق كرة اليد لتحفيز الفريق مع كابتن ايمن صلاح و بالتوفيق دايما ان شاء الله
ليست هناك تعليقات:
إرسال تعليق