" حوار مع تامر عبدالحميد " دونجا الزمالك " "
سـ1 : اهلا بنجم الزمالك تامر عبدالحميد دونجا الزمالك وصاحب الرئتين معنا .. بداية جمهور الزمالك يسأل لماذا كل الاختفاء من تامر عبدالحميد عن الظهور ؟؟
جـ1 : اهلا بيك يا عمر والهلا بكل جمهور الزمالك .. مش مختفي والله بس مختفي عن الاعلام شويا ولكن انا زي اي مدرب بيدأ مسيرته فبدأت مع الدرجة الثانية مع اشرف قاسم كمدرب عام ثم كمدير فني مع بني عبيد 3 سنين ثم مع بلقاس
ولكن عدم ظهوري في الاعلام هو اللي بيخلى الناس تحس اني مش موجود ولكن انا مش حابب اني اشتغل في الناشئين بسبب اني اولا معنديش المؤهلات اللي تساعدني في الامر ده غير اني عصبي فمعنديش امر الصبر على الناشئ
وامر زي العصبية مش هيجيب نتيجة مع الناشئ فانا اخدت طريق اني اشتغل مع الدرجة الثانية
سـ2 : البعض بيحمل اختفاء البطولات عن الزمالك على عدم ظهور الجيل الذهبي للزمالك في النادى وتقلده للمناصب ايه رأيك في الكلام ده ؟
جـ2 : بصراحة الجيل بتاعنا مميز عن اي جيل تانى بمعنى انه جيل عنده كرامة وحب للنادي اننا على الرغم من اننا اعضاء عاملين في النادى مش بنقعد في النادى
نقطع في اللي موجود عشان نشتغل في النادى لا احنا جيل عنده كرامة وحب للنادى ولو النادى طلبنا في اي وقت هنبقى تحت امره بدليل انى كنت هدخل مع المستشار مرتضى منصور في الانتخابات السنة دى لكن محصلش نصيب
واحنا تحت امر النادى دوما لان النادى ده حياتنا وعمرنا ولو كلمت بشير او ابو العلا او مدحت او او هتلاقى نفس الكلام واللي يوضح ده انى كان لي مستحقات بنص مليون عند الزمالك من وقت اعتزالى ولما طلبت بيهم
والنادى مكانش قادر يدفعهم قلت خلاص مفيش مشكلة لانى واحد معملتش مشكلة وانا بلعب هعمل بعض الاعتزال !!
سـ3 : من رأيك ما هو سبب ابتعاد الزمالك عن البطولات في اخر 8 سنوات ؟؟
جـ3 : الادارة دائما هي سبب المشاكل في السنوات الاخيرة ولكن مع المستشار مرتضى منصور خصوصا في الصفقات اللي المجلس دخل فيها بشل جامد واي لاعب بيظهر بمستوى ممتاز في الدوري الزمالك بيبقى له كلمة عليه
فهو ده امر كان ناقص الزمالك ولكن كلمة للمستشار مرتضى انه ينسى شوية انه مشجع وانه يقدر يسيطر على انفعالاته ويسيطر عليها وتكون ما بينه وبين نفسه
ورغم ذلك هو بيبقى عايز يطلع اللي جواه من حبه للنادى بدليل انه جاب 17 لاعب من لا شئ و الجمهور مكنش يحلم بيهم والان الفريق اول الدوري وماشى كويس وان شاء الله البطولات تتحقق السنة دى
سـ4 : هل من رأيك الزمالك قادر على تحقيق البطولات هذا الموسم ؟؟
جـ4 : انا براهن السنة دى لو الفريق قدر يفوز بالدوري مفيش فريق هيقدر ينافسه لمدة 3 او 4 سنين قادمة لو مقدرناش لا قدر نكسب الدوري هيرجع الفريق لدوامة المشاكل من جديد لان كل الظروف مهيأة للنجاح لان الزمالك في طفرة رياضية وادارية ظاهرة للجميع
سـ5 : من رأيك هل الزمالك يحتاج لبقاء محمد صلاح كمدير فني ام تفضل المدرب الاجنبي ؟
جـ5 : انا من رأيي الافضل هو المدرب الاجنبي ويمكن رأيي زعل البعض لما كتبت على صفحته الرسمية اني فضل وجود فييرا ويمكن كان رأيي مدرب اجنبي عامة مش فييرا بالتحديد
لأن الاهلى والزمالك بيحتاجوا دوما لمدرب اجنبي بسبب ان الضغط الاعلامي بيبقى على المدرب المصري كبير وبيسمع الانتقادات وبيتأثر فيها من الصحافة اما نظرتى ان المدرب الاجنبي هو الانسب
لانه مش بيسمع للامور دى وبيبقى تركيزه في الملعب بشكل دائم لكن رأيي في كابتن محمد صلاح انه مدرب ممتاز والجهاز اللي معاه وكابتن اسماعيل يوسف
لكن الزمالك فريق بيحتاج لمدرب عنده شخصية يقدر انه يسيطر على الفريق خصوصا ان عندك 25 لاعب و5 ناشئين كلهم نجوم فوجوده ضروري
سـ6 : البعض بيشبه طريقة لعب ابراهيم صلاح بطريقة لعبك وانه بيسير على خطاك مع نادى الزمالك ؟
جـ6 : ابراهيم صلاح من اللاعيبة الممتازه جدا ولاعب لسه صغير كمان وجه الزمالك وهو صغير عكس اني جيت وانا كبير شويا .. ابراهيم من الناحية الدفاعية ممتازه جدا هو بيقوم بالدور بتاعه المطلوب ولكن
لازم ابراهيم يطور نفسه في الناحية الهجومية لانه عنده امكانيات في التطور الهجومي من خبرة ونفس ولكن مش عشان ابراهيم حبيبي هقولك عالمي ومفهوش عيوب لا لازم اقوله الامور اللي لازم يتطور فيها
سـ7 : احمد توفيق احد ناشئي نادى المنصورة هل من رأيك هيسير على نفس دربك خصوصا انك ايضا من ناشئي المنصورة ؟
جـ7 : احمد توفيق من اللاعبية الممتازه جدا وله مستقبل واعد وبيعجبني فيه جدا انه بيطور نفسه في الجوانب الهجومية بشكل مستمر
سـ8 : جمهور الزمالك يشتاق لعودة البطولات . وانت كنت من جيل لقب بالجيل الذهبي يمكن اكتسح افريقيا اكثر من 3 او 4 سنوات ؟
جـ8 : والله الواحد محظوظ انه كان في جيل زي ده يمكن بشبه بجيل العباقرة يعنى لما تلاقى في الدفاع وائل القباني ومدحت عبدالهادي والاطراف ابراهيم حسن وطارق السيد وقدام حسام حسن لاعب عنده 35 سنة
بيجري في الملعب كأنه لاعب ناشئ فده كان الدافع الاكبر انك تبقى كويس غير اننا مكناش بنبص للفلوس وقتها كان اهم شئ دخلنا بطولات اننا نكسبها ويمكن كل البطولات خدناها الا دوري 2002 اللي خدها الاسماعيلي
كنا فريق قوي جدا يمكن فريق جوه الملعب وفريق على الدكة فده كان بيدفعك انك تحافظ على مكانك فانا شايف انه جيل لا يعوض غير الاستقرار الاداري من المجلس مع الاستاذ كمال درويش
سـ9 : مجلس المستشار مرتضى منصور عمل طفرة رياضية واجتماعية كبيرة في النادي ايه رأيك فيها ؟
جـ9 : من رأيي ان المجلس عمل الى الان عمل ممتاز جدا خاصة على فريق الكرة من توفير الصفقات وتوفير المستحقات بشكل دائم وعدم وجود خلافات بين اعضاء المجلس وده يرجع لانهم
قائمة واحدة ففي بينهم تفاهم كبير وتعاون وده درس يمكن اتعلموه من دروس الماضى
سـ10 : الزمالك ضم هذا العام 17 صفقة قوية ايه رأيك فيهم ومين من رأيك الصفقة الانجح حتى الان ؟
جـ10 : صفقات قوية جدا ولكن انا شايف ان في لاعيبة منهم هتمشى وهيجي مكانهم لاعيبة اخرى غير ان عبدالشافي ان شايف ان طالما الفريق بيصرف المصاريف دي يبقى كان بقاءه ضروري
لان وجوده بيدي ثقل كبير للجبهة الشمال خصوصا مع عدم وجود بديل لاحمد سمير وانه لسه صغير عكس الجبهة اليمنى في عمر جابر ورضا العزب اللي اتمنى ميمشيش ولو مشى يجي حد مكانه بمستوى قوي
واكيد هنلاقى ناس هتمشى وناس تيجي مكانها عشان يشكلوا فريق بدكة قوية والاهم اننا نعمل دكة قوية لان دي من اهم عوامل قوة الفريق لان عمر ما اللاعب هيادى لك نفس المستوى طوال 30 ماتش من غير انخفاض مستوى او اصابة مثلا
سـ11 : الناس بتتكلم عن رجوع محمد ابراهيم وشيكابالا البعض بيعتبر رجوعهم اضافة قوة كبيرة للفريق البعض شايف انه لا رجوعهم هيعمل مشاكل .. ايه رأيك في الموضوع ؟
جـ11 : الامر في رجوعهم يرجع للمدير الفني يعنى مثلا عندك دلوقتى في صناعة اللعب ايمن حفني واحمد عيد ومصطفى فتحي ولما تجيب شيكابالا ومحمد ابراهيم هيبقوا اضافة
الامر في ايد المدير الفني انه يقدر يلعب اثنين او ثلاثة منهم من غير مشاكل لانهم 5 نجوم
سـ12 : ندخل في الديربي الان .. تامر عبدالحميد لعب مباراة لاهلى والزمالك كثير ايه نصحيتك للاعيبة والجهاز الفني قبل المباراة
سـ12 : انا مش طالب من محمد صلاح انه يألف انا طالب الشئ المنطقي يعمله غير كده اللاعيبة اللي هتلعب يكون عنده الثقة انها لازم تكسب ولازم في البداية الفريق ينزل بضغط مستمر من وسط الملعب ولازم تكشر عن انيابك عشان اللاعيبة تحس بالثقة اما لو نزلت متراخى انك هتكسب مش هتكسب فانا بقول انك من الاول لازم تحسمها وتموت نفسك في الملعب تجيب الاول فالثاني ثم تبدأ تلعب كرة على الارض بشكل ممتع لان عندنا لاعيبة كورة ممتازة وبالتأكيد الاهلي هيبقى عامل مان تو مان على حفني فهيبقى الحمل كله على احمد عيد لانه هيكون له دور اكبر زي امام المقاولون لما كابتن حسن لعب عليه مان تو مان قدر يوقف جزء كبير من خطورته ويمكن لما حفني بيلعب براحته زي امام بتروجيت بتحس ان الزمالك له شكل في الملعب وبيمتع الكل
سـ13 : تامر عبدالحميد كان فريق اللي كسب مباراة 3-1 امام الاهلى .. ايه ذكرياتك مع المباراة وظروفها ؟
جـ13 : المباراة كانت اول ديربي بعد مباراة 6-1 وكانت بمثابة رد للقلم اللي كان في مباراة 6-1 .. فالاعيبة كانت نازله عندها حماس واصرار ويمكن مباراة 6-1 لو اتكررت مليون مره عمرها ما كانت هتنتهي كده فكان 3-1 رد اعتبار وكنا نازلين بتركيز وحماس من اول دقيقة لاخر دقيقة
جـ14 : ايه رأيك في اختيار حكم اجنبي لادارة مباراة القمة ؟
جـ14 : افضل قرار لان الحكم المصري في ظل جو زي ده هيبقى عليه ضغوط كبيرة وفي كل قرار هيفكر فيه وهو بياخده وممكن لو ظلم فريق يجامله بعد كده زي مباراة انبي اللي كانت فضيحة بكل المقاييس لذلك فالافضل هو حكم اجنبي لانه بيبقى بعيد عن الضغوط
سـ15 : من افضل لاعب في مصر من رأيك ؟
جـ15 : من رأيي مش شايف ان في لاعب مستواه ثابت زي طارق السعيد لما خدها في 2000 او حازم امام في مستواه انما الاقرب حفني وتريزيجيه لكن اداءهم مش ثابت على طول فيمنفعش اديهم لقب الافضل وبرضوا من اللاعيبة الممتازه في الدوري زي جيمس بيكلي لاعب بتروجيت واحمد الشيخ لاعب المقاصة
سـ16 : مؤمن زكريا وانتقاله للاهلي وكان لك رأيي في هذا الامر ؟
جـ16 : مشكلتي مع مؤمن زكريا انه لاعب الاهلى سابه وهو صغير والزمالك كبره وعمل منه نجم بعد ما كان محدش يعرفه تماما وبعد كل ده فضل الاهلى على الزمالك بسبب شوية فلوس زيادة فده امر ازعجنا وازعج كل جمهور الزمالك ولو شفنا اللي عمله ابراهيم صلاح عكسه تماما لما رجع وكان عقد الاهلى فلوسه اكثر ولكن فضل الزمالك لان الزمالك له فضل عليه وهو اللي عملنا كلنا فلازم نرد له الجميل
سـ17 : تشكيلة تامر عبدالحميد للافضل في مصر ؟
احمد الشناوي
عبدالشافي على جبر كوفي عمر جابر
ابراهيم صلاح حسام عاشور
ايمن حفني وليد سليمان
جون انطوي وائل فراج
سـ18 : كلمة اخيرة لجمهور الزمالك ؟
جـ18 : جمهور الزمالك جمهور عظيم يمكن استحمل الفريق اكثر من اي جمهور في العالم واي جمهور غيرهم كان ساب فرقته من زمان ومشجعهاش تاني ولكن الجمهور دي فيها شئ غريب جدا ويمكن في وقت الانكسار الجمهور بيبقى اكثر في ظهر النادي ويمكن يستهلوا كل البطولات وبقولهم اوعى تتخلوا عن ناديكم ابدا ويمكن قوة الفريق من قوة الجماهير
ليست هناك تعليقات:
إرسال تعليق