" الزمالك التكتيكي "

 الزمالك المستهتر ينتصر على الاسيوطى الضعيف في مباراة كانت هتروح من الزمالك بسبب الاستهتار والتراخى اكثر من مرة لكن الحمدلله ربنا سترها !

هنستعرض تشكيل المباراة وهيكون لينا تعليق عليها :

تشكيل كان موفق جدا من باتشيكو بالبدأ بـ 4-2-2-2 وانك تبدأ باثنين مهاجمين زي احمد على وباسم مرسى امام فريق زي الاسيوطى ملعبه ضيق وبيقفل مساحات محتاج تلعب قدامه على الكور العرضية بشكل كبير

خصوصا مع وجود احمد على وباسم اثنين لاعيبة قناصة في العرضيات واثنين مميزين في العرضيات حازم واحمد سمير فكان لازم البدأ باحمد على بجانب باسم مرسى

 " تحليل المباراة "

1- الزمالك بدأ اللقاء بضغط كبير من وسط ملعب الرجاء في اول 10 دقائق كانت بتربك الرجاء بشكل كبير لانه كان بيتم عن طريق الشكل الاتى :

 ضغط قوى جدا من خلال رجوع احمد على لمركز Amf وتقدم الجناحين للضغط من منطقة جزاء الاسيوطى وضغط باسم على قلبى دفاع الاسيوطى واحمد على على وسط ملعبهم وبيزيد معاه احمد توفيق فكان بيقفل تماما الملعب على الرجاء وبيمنع تقدم لاعيبتهم لخطوط الزمالك

2- باتشيكو بدأ اللعب مركز على الجبهة الشمال للاسيوطى اللي كان غايب عنها الظهير الاساسي محمود رمضان وكان بيلعب فيها اسلام جمال لاعب الوسط وده ظهر من خلال ان اللعب اترمى في اول 10 دقيقة على الجبهة دى من خلال حازم امام وباسم اللي كانت كل تحركاته من خلال الجبهة دى

3- احمد على كان بينزل في مركز AMF بشكل متكرر يعمل زيادة في نص الملعب مع الطرفين وثنائي الوسط بحيث يقفل نص الملعب تماما ويعمل ضغط على نص ملعب الاسيوطى ويقوم بدور في صناعة اللعب في هجمة الزمالك

هو دور نجح فيه احمد على بنسبة كبيرة ونجح في كورة الهدف الثانى يلعب كورة ممتازه لباسم كانت سبب الهدف

3- من بعد الدقيقة 10 بدأ يظهر تراخى في الاداء وتباعد بين الخطوط بشكل كبير افقد الزمالك السيطرة على المباراة الفريق اللي بيضغط دايما علينا من نص ملعبنا بيخلق ميس باص كثير وبيعمل ارتباك عند اللاعيبة خاصة الاثنين مدافعين 

وده سببه هو بطئ ثنائي الوسط دايما ايا كان مين طارق ولا توفيق ولا ابراهيم صلاح فالتحضير حل امر زي ده وهو تمرين اللاعيبة على الباص السريع او من لمسة واحدة وبدقة او انك تلعب على الكور العالية وتعتمد على المهاجمين في الاستقبال

4- ظهرت اخطاء ساذجة من على جبر و دوايدر خاصة على جبر اللي مستواه بيقل ماتش عن الثانى وبدل ما كان بيلعب السهل بدأ يلعب الصعب المنافسة في الدفاع مش سهلة

 واي لاعب هينزل مستواه هيكون مكانه المدرجات مش حتى الدكه لان في لاعيبة كثير عايزه تاخد فرصة زي اسلام جمال وبازوكا وياسر ابراهيم

5- لما تلاعب فريق في مساحات ضيقة ولاعيبتك مش بتنفذ الباص السريع بشكل صح يبقى تعتمد على الكرات العالية للمهاجمين او تعتمد على سرعات الطرفيين حازم ومؤمن واختراقتهم في عمق دفاع الاسيوطى المهلهل

6- لاسيوطى لعب على جبهة احمد سمير كالعادة اللي اي فريق في بيلعبنا بيلعب عليها وبيشكل منها خطورة للمباراة التانية بسبب انخفاض مستوى الوسط بشكل عام خاصة ابراهيم صلاح

 اللي بيقدم مباراة سيئة للغاية من حيث الاستخلاص والضغط على حامل الكرة والميس باص و واضح عليه زيادة شويا في الوزن

7- احمد توفيق قدم مباراة رائعة كالعادة في استخلاص الكرة الممتاز منه في كل مناطق المباراة وباصاته ومساندته الهجومية الممتازه لقدام ولياقته البدنية الممتازه لاخر دقيقة في المباراة

احمد توفيق احصائياته بتثبت كلمنا بنسبة باص صحيح 88% واستخلاص للكرة 25 مرة بنسبة ممتازة جدا استحق عليها نجم المباراة

و غطى على سوء اداء ابراهيم صلاح وبيثبت للجميع انه مشروع لاعب خط وسط ممتاز في خلال وقت قصير هيكون مؤهل لقيادة وسط الزمالك لسنين جاية

 8- الاسيوطى لعب على جبهة احمد سمير كالعادة اللي اي فريق في بيلعبنا بيلعب عليها وبيشكل منها خطورة للمباراة التانية بسبب انخفاض مستوى الوسط بشكل عام خاصة ابراهيم صلاح

اللي بيقدم مباراة سيئة للغاية من حيث الاستخلاص والضغط على حامل الكرة والميس باص و واضح عليه زيادة شويا في الوزن

9- تغيير باتشيكو عيد بدل من حازم امام تغيير من رايي كان غير موفق لان حازم كان افضل وكان لازم يخرج باسم الغير موفق وينزل حفنى اللي كان وجوده من بداية الشوط التانى

مع اندفاع الاسيوطى لقدام كان هيعمل مساحات كبيرة في خط دفاعهم وده كان اكثر واحد يقدر يستغلها هو حفني ومعاه حازم امام 

مع التغيير ده اتغير شكل الزمالك للشكل للاتى : 

10- مع نزول حفنى بدلا من باسم مرسى اتحول شكل الزمالك الاتى :

نزول حفنى فتح للزمالك مساحات كبيرة للعب لان الاسيوطى فتح مساحات دفاعه تماما وبدأ حفنى يتحرك في عمق الدفاعات ومن خلالها قدر الزمالك انه يشكل خطورة كبيرة على الاسيوطى خاصة بعد نزول حفنى اللي كان بمثابة ماكينة لصناعة الفرص السهلة التى اضاعها لاعبي الزمالك

 تغير ادى اريحية كبيرة لاحمد توفيق في الزيادة الهجومية وبقى تركيزه اكثر في الشق الدفاعي وضمن للزمالك لاعب ثالث بيضغط من دائرة النص في الهجمة اللي على الزمالك وكمان ادى اريحية هجومية لاحمد على لانه اتحول كمهاجم وحيد

11- استهتار ودلع كبير ظهر من لاعيبة الزمالك في الشوط التانى كان ممكن يضيع مباراة سهلة جدا زي دى من ايد الزمالك ونتعاقب بهدف ثانى بس الحمدلله ربنا سترها وعدت على خير

12- خطأ كبير من باتشيكو فاللي عمله في ضربة الجزاء .. اكيد احنا معاه فان الانضباط هو اللي ينتصر ولكن كا ممكن يسيب عيد يسدد ضربة الجزاء ويعقبه بعد ذلك ماليا لكن 

انك تزعق للاعب في الملعب وتجبره انه يسيب ضربة الجزاء دخل احمد سمير للتسديد متوتر وقلقان ودائما لما بتحصل الامور دى ضربة الجزاء بتضيع 

13- بطئ التحضير وسذاجة باصات الدفاع هي اخطاء لازم يتم حلها خصوصا انك على ابواب لقاء مع انبي فريق قوى عنده خط هجوم قوى ونص ملعب سريع وعنده استغلال ممتاز للكور الثابتة ولاعيبة كثير مهارية هتعملنا قلق كبير لو فضل المستوى بالشكل ده

على جبر من رايي المباراة الثادمة ميبدأش كأساسي ويلعب بكوفى ودوايدر عشان على جبر يحس بالخطر على مركزه الاساسي ويبدأ يفوق

" اخطاء اللاعبين "

فقرة هيتم استعراض فيها اخطاء تمركز اللاعبين في الفرص الضائعة على مرمى الزمالك او تمركزهم في الاهداف اللي بيستقبلها الزمالك في المباريات 

 1- خطأ في تمركز لاعيبة الزمالك بتوضحه الصورة في وجود لاعبين في عمق الدفاع احرار تماما مع وجود 4 لاعيبة من الزمالك في المنطقة دون الامساك باحد منهم

الكرة هتترد للمهاجم من جديد ولولا التغطية السريعة من على جبر كانت الكرة هتشكل خطورة كبيرة على الزمالك

 

 2- خطأ تانى مشترك بين احمد سمير وابراهيم صلاح .. الصورة بتوضح تراخى من ابراهيم صلاح في الضغط على محمود شديد و وجوده من الاساس في مكان غلط

بتتلعب الكرة ما بينهم بتروح لمهاجم الاسيوطى بيسددها في على جبر وبترجع للاعب وسط الاسيوطى اللي كان في مساحة فاضية تماما بسبب تمركز ابراهيم صلاح من الاول بشكل خاطئ وتحركه في مركزه مش مركزه

3- خطأ الهدف هو خطأ مشترك ما بين على جبر واحمد توفيق .. الصور هتوضح تمركز على جبر السئ في منطقة الجزاء بجانب ان مهاجم الاسيوطى قدام من بره المنطقة

فكان لازم على احمد توفيق انه لما يلاحظ دخوله المنطقة يتحرك معاه ويغطى على جبر ويقضى على خطورة المهاجم اما دوايدر فمن رايي لا يتحمل الا القليل من الهدف